ახალგაზრდა მკვლევართა პროგრამა

„ახალგაზრდა მკვლევართა პროგრამა“ CRRC-საქართველოს სასტიპენდიო პროგრამას წარმოადგენს, რომელიც 2009 წლიდან არსებობს. პროგრამა 5-9 თვე გრძელდება და შერჩეულ ახალგაზრდებს ფართო სამუშაო გამოცდილებასა და პრაქტიკას სთავაზობს. ეს გახლავთ უნიკალური შესაძლებლობა სოციალურ მეცნიერებებზე ორიენტირებული ახალგაზრდა მკვლევართათვის, შეიძინონ ახალი უნარები და შეძლონ კომპლექსური საკითხების სწრაფი და სიღრმისეული ანალიზი, აგრეთვე შეისწავლონ მნიშვნელოვანი კომპიუტერული პროგრამები, მათ შორის სტატისტიკური პროგრამები. ასევე, „ახალგაზრდა მკვლევართა პროგრამა“ საშუალებას აძლევს ახალგაზრდებს, იმუშაონ გამოცდილ პროფესიონალებთან და დარგის სპეციალისტებთან ერთად. ახალგაზრდა მკვლევრებს მოეთხოვებათ ისეთ კომპლექსურ კვლევით პროექტებში ჩართვა, რომლებიც საქართველოს მომავლისთვის მნიშვნელოვან საკითხებს ეხება. ასევე, მათ მოეთხოვებათ ანალიტიკური პოლიტიკის ნარკვევების წერაში მონაწილეობის მიღება, გუნდის აქტიური წევრობა და შრომისმოყვარეობა.

საკონტაქტო ინფორმაცია: თამარ ხოშტარია, ელფოსტა: tamuna@crrccenters.org

ფილტრაცია

თინათინ გაგოშიძე

თინათინ გაგოშიძე გამოყენებითი სოციალური ფსიქოლოგიის მაგისტრია. ის ასევე ფლობს თბილისის სახელმწიფო უნივერსიტეტის ფსიქოლოგიის ბაკალავრის ხარისხს. უნივერისტეტში სწავლისას მას ჩატარებული აქვს როგორც თვისებრივი ასევე რაოდენობრივი კვლევები. მისი სამაგისტრო ნაშრომი შეეხებოდა სკოლის მასწავლებელთა აღქმული სოციალური სტატუსის, მათი სოციალური იდენტობისა და კარგად ყოფნის ურთიერთმიმართების დადგენას. თინათინი იყო ახალგაზრდული გუნდის წევრი არასამთავრობო ორგანიზაციაში ,,პრევენცია პროგრესისთვის“ სადაც მუშაობდა ორგანიზაციის პრიორიტეტულ მიმართულებებზე – ბავშვთა კეთილდღეობა და არასრულწლოვანთა მართლმსაჯულება. ამასთან, აქვს სამუშაო გამოცდილება სერვისის განვითარებისა და მონიტორინგის მიმართულებით. თინათინის კვლევითი ინტერესები შეეხება განათლების პოლიტიკის, ბავშვთა კეთილდღეობისა და საზოგადოებაში არსებული დამოკიდებულებებისა და სოციალური განვლენების კვლევას.

თამარ უზუნაშვილი

თამარ უზუნაშვილი თბილისის სახელმწიფო უნივერსიტეტის საჯარო მმართველობის მაგისტრია. ხოლო ბაკალავრის ხხარისხი მიღებული აქვს პოლიტიკის მეცნიერების მიმართულებით. CRRC-ში მოსვლამდე გავლილი აქვს GIPA-სა და სტრატეგიისა და განვითარების ცენტრის ერთობლივი სასერთიფიკატო პროგრამა საჯარო პოლიტიკის ანალიზის მიმართულებით. უმუშავია პოლიტიკის დოკუმენტების შექმნაზე. უნივერსიტეტის კურსების ფარგლებში შესრულებული აქვს სხვადასხვა კვლევა, ძირითადად თვისებრივი კვლევის მეთოდების გამოყენებით. გარდა ამისა, მას ACT Georgia-ს მუნიციპალური სერვისებით კმაყოფილების კვლევის ფარგლებში სიღრმისეული ინტერვიუებისა და ფოკუს ჯგუფების ჩატარების გამოცდილება აქვს. მისი ძირითადი კვლევითი ინტერესი უკავშირდება განათლების პოლიტიკასა და ადგილობრივ თვითმმართველობებს.

ნინო ლობჟანიძე

ნინო ლობჟანიძე თბილისის თავისუფალი უნივერსიტეტის სოციალური მეცნიერებების ბაკალავრია. ვიდრე CRRC-საქართველოს „ახალგაზრდა მკვლევართა პროგრამას“ შემოუერთდებოდა, ნინომ ქოფირაითერად მუშაობის გამოცდილება მიიღო. ის პარალელურად ჩართულია კვლევითი და ანალიტიკური ორგანიზაციის, „სტუდია გეორგიკას“ პროექტში – „Podcast De Re Publica“, რომლის მიზანია კულტურული იდენტობისა და ქართული სახელმწიფოებრივი აზრის განვითარების დინამიკის შესწავლა-გავრცელება. მისი კვლევითი ინტერესები კულტურულ და სოციალურ საკითხებს მოიცავს.

ოთარ ჯინჭარაძე

ოთარ ჯინჭარაძე პოლიტიკისა და საერთაშორისო ურთიერთობების მაგისტრია. მას, ასევე, მიღებული აქვს საერთაშორისო ურთიერთობების ბაკალავრის ხარისხი. Erasmus+ გაცვლითი პროგრამის ფარგლებში, ბაკალავრის საფეხურზე, განათლება მიღებული აქვს იანოს კოდოლანის უნივერსიტეტში, ბუდაპეშტში, საერთაშორისო ურთიერთობების განხრით. CRRC-საქართველოში მუშაობის დაწყებამდე, ოთარს სამუშაო გამოცდილება დაუგროვდა საქართველოს ტურიზმის ადმინისტრაციის კვლევების განყოფილებაში და საქართველოს სტრატეგიისა და საერთაშორისო ურთიერთობების კვლევის ფონდში. ასევე, მან მიიღო საუკეთესო დელეგატის წოდება ევროკავშირის მიერ ორგანიზებულ LEAP-ის სიმულაციურ პროექტში, რომელიც გაიმართა კოსოვოში. ოთარის კვლევითი ინტერესები მოიცავს რუსეთისა და ევროკავშირის აქტივობებზე დაკვირვებას პოსტსაბჭოთა ქვეყნებში.

ნინო ანჩაბაძე

ნინო ანჩაბაძე ფლობს თბილისის სახელმწიფო უნივერსიტეტის ფსიქოლოგიის ბაკალავრის ხარისხს. CRRC- საქართველოს “ახალგაზრდა მკვლევართა პროგრამაში” ჩართვამდე, უნივერსიტეტში სწავლისას, მას ჩატარებული აქვს რაოდენობრივი და თვისებრივი კვლევები, საიდანაც ერთ-ერთი დაიბეჭდა სტუდენტურ სამეცნიერო ჟურნალ „ფსიქოლოგია და განათლების მეცნიერებებში“. ასევე, მოხალისეობრივად ჩართული იყო საერთაშორისო კვლევით პროექტში – „რელიგიურობა, სულიერება და რწმენა, რომელიც ამართლებს ომს“. მისი კვლევითი ინტერესები მოიცავს სოციალური ფსიქოლოგიის საკითხებს.

თეიმურაზ კობახიძე

თეიმურაზ კობახიძეს მიღებული აქვს თბილისის თავისუფალი უნივერსიტეტის საერთაშორისო ურთიერთობების ბაკალავრის ხარისხი. თეიმურაზი ჩართულია პროევროპულ კამპანიაში – „27+1“, სადაც ის მკვლევრის პოზიციაზე მუშაობს. კამპანიის ფარგლებში, იგი აქტიურად არის ჩართული ღონისძიებების ორგანიზებაში. მისი კვლევის ინტერესებია: დემოკრატია, პროპაგანდა, ჩინეთის პოლიტიკა და საერთაშორისო უსაფრთხოება. მისი საბაკალავრო ნაშრომი იკვლევს ჩინეთის პოლიტიკას რუსეთის უკრაინაში შეჭრის დროს.

ქრისტინე ჯინჭველეიშვილი

ქრისტინე ჯინჭველეიშვილი დიპლომატიისა და საერთაშორისო პოლიტიკის მაგისტრია. მას ასევე მიღებული აქვს ბაკალავრის ხარისხი საერთაშორისო ურთიერთობებში. როგორც ერაზმუს+ გაცვლითი პროგრამის სტიპენდიატი, ქრისტინე სწავლობდა საფრანგეთში, ლილის კათოლიკურ უნივერსიტეტში. CRRC-საქართველოს ახალგაზრდა მკვლევართა პროგრამაში ჩართვამდე, ის აქტიურად მონაწილეობდა სამეცნიერო კონფერენციებში და მუშაობდა საერთაშორისო ურთიერთობების სხვადასხვა საკითხზე. ქრისტინეს კვლევითი ინტერესები მოიცავს დემოკრატიზაციას, უსაფრთხოების გამოწვევებსა და ევრო-ატლანტიკურ ინტეგრაციას.

ნუცა მეცხვარიშვილი

ნუცა მეცხვარიშვილს მიღებული აქვს კავკასიის უნივერსიტეტის ბაკალავრის ხარისხი სოციოლოგიაში. CRRC-საქართველოში მუშაობის დაწყებამდე, ნუცას კვლევით კომპანია ACT-ში სატელეფონო ინტერვიუერად და ტრანსკრიპტერად მუშაობის გამოცდილება აქვს. იგი მუშაობდა შემდეგ კვლევებზე: ბაზრის კვლევა, კმაყოფილების კვლევა და სხვა. ასევე, უნივერსიტეტში სწავლის დროს ჩართული იყო სხვადასხვა კვლევით პროექტში. მისი კვლევითი ინტერესები ეხება დასაქმებისა და შრომითი უსაფრთხოების საკითხებს.

12 3 4 5 6 7